話明自由行，無理由唔識當地交通工具！今次去到都係搭捷運為主：一來人生路不熟，對當地交通幾乎零認知，二來搭捷運已經去到台北市內大部份景點（如淡水老街、動物園、中正紀念堂等等）。成個自由行旅程中只有六次坐巴士（桃園機場<->台北市、捷運站<->台北101大樓 同 瑞芳火車站<->九份）。
車站月台同香港都係大同小異，部份車站設有月台門，有啲舊嘅車站冇（嗰條架空嘅文湖線起哂Ｄ幕門，焗到hihi）。同香港唔同，台北捷運有大量直通行駛（Ａ線列車駛至Ａ線總站後直接駛入Ｂ線行駛）、區間車（指唔會行走全線的班次）。同埋唔好以為好似香港咁有廣播話架車去邊：台北捷運月台係唔會有廣播話架車去邊！就連列車即將到站都唔會有（點知列車到站一陣講）。機本上搭台北捷運真係要打醒十二分精神，上車前要好似輕鐵咁睇清楚架車係去邊、經唔經你想去個站（或者可以望呢部電視，會講下一班車開去邊）。唔好一見到架車就衝上車！
因為月台冇廣播，咁點知先架車到？就要靠地下嘅紅燈：當紅燈閃下閃下時，列車即將到達。（其他線冇搭到唔知，文湖線唔記得，但淡水同板南線都係咁）。
轉乘方便就真係唔係咁好，有啲站落車後都要行一段路（上上落落）先到另一個月台（似九鐵路線轉地鐵路線咁），但指示充足，唔會行錯（台北車站咁大都冇行錯）。而係呢幾日所見，台北市民搭車都會好自覺咁企埋一邊排隊，會先讓乘客落車！唔似香港咁一字排開，一開門就即刻衝上車…….
講捷運冇理由唔講下個收費系統啦，有單程飛同智能卡（悠遊卡）。單程飛最低NTD 20，同深圳地鐵一樣：都係個銀仔，入閘時拍落個感應器、出閘投入部閘機就得。仲有買單程飛要先check想去個車站幾錢先，之後先係部機到買飛。
我今次去就用咗悠遊卡，似八達通咁：普通卡每張NTD 500，其中NTD 400係可用金額，仲有嗰NTD 100係可退還按金、可以最多去到負NTD 60。係各捷運站售票機就可以買到，用佢搭捷運會有八折優惠。同埋可以用嚟買嘢、入動物園、搭高鐵／台鐵（指定車站）／巴士／的士。臨走前可以到各車站退卡拎返按金同餘額，好似用唔知幾多次就唔收手續費（我退時唔駛俾手續費）。自由行強烈建議買悠遊卡，一來方便好多、二來可以全數退錢。
下回講「台鐵同九份」。
Loading tweets...
